Túrmedegi aqyn, belsendi, dıssıdent Aron Atabekti bosatý jóninde 2,5 myń adamnyń qoly qoıylǵan hat prezıdent Qasym-Jomart Toqaevqa joldandy. Bul jóninde quqyq qorǵaýshy Baqytjan Tóreǵojına  Facebook paraqshasynda habarlady. 

"Qoǵamnyń prezıdent Qasym-Jomart Toqaevqa Aron Atabekti bostandyqqa shyǵarý jónindegi úndeýi jiberildi. Hatqa 2,5 myńǵa jýyq qol qoıyldy, 377 repost jasaldy. Kóp raqmet!" delingen habarlamada. 

Aron Atabekke raqymshylyq jasaý jónindegi hatqa qol jınaý ótken aptada bastalǵan.

Aıta keteıik, 18 tamyz kúni Azaptaýǵa qarsy ulttyq aldyn alý tetigi tobynyń ókilderi Pavlodar oblysyndaǵy AP-162/1 túzetý mekemesine jazasyn ótep jatqan aqyn Aron Atabekke barǵannan keıin, onyń haliniń nashar ekenin aıtqan edi.

Aron Atabek 15 jyldan beri túrmede otyr. Ol 2006 jylǵy "Shańyraq" oqıǵasynan keıin 18 jylǵa sottalǵan. Sot Atabekti "Shańyraq" oqıǵasy kezinde qaza tapqan polısıa qyzmetkeriniń ólimine aıypty dep tanyǵan.

Toqaevtyń atyna jazylǵan hatty myna siltemeden oqı alasyz.